Nammineerluni nalunaarsuiffiit e-Boksi aqqutigalugu nassiussuunneqarsimalerput. Taamaattumik nammineerluni nalunaarsuiffinni paasissutissat 2023-mut tunngasut eqqortuunersut misissussallugit amigaataasalu ilanngunnissaat piffissanngorpoq.
Nammineerluni nalunaarsuiffik qaqugu nassiunneqassava?
Nammineerluni nalunaarsuiffik naqqiissutitalik Akileraartarnermut Aqutsisoqarfimmut kingusinnerpaamik 1. maj 2024 nassiutissavat.
Nammineerluni nalunaarsuiffik namminersorluni inuussutissarsiuteqartunut sullissivik.gl- ikkoorlugu kingusinnerpaamik maajip 15-iani 2024 nassiunneqassaaq.
Eqqaamassavat inuussutissarsiutinnut atatillugu aningaasat isertitatit aningaasartuutitillu nammineerluni nalunaarsuiffimmut nalunaarsussagakkit
Suliffeqarfinni isertitaqarsimaguit eqqaamassavat paasissutissat taakku nammineerluni nalunaarsuiffimmut ilanngullugit nalunaarsussagakkit. Suliffeqarfinni isertitatit nammineerlutit nalunaarutiginngikkukkit, suliffeqarfinni iluanaarutit pillugit Akileraartarnermut Aqutsisoqarfik missingersuinikkut angissusiliisinnaanermut pisinnaatitaavoq.
Inuussutissarsiuteqartutut aningaasartuuteqarsimaguit akileraarutinnut ilanngaatigisinnaajumallugit eqqaamassavat taakku nammineerlutit nalunaarsussagakkit. Aningaasartuutit taakku tassaasinnaapput ikummatissaq/orsussaq, isumannaallisaanermut atortut, atortussat allat, assartuinermut aningaasartuutit il.il.
Eqqaamallugu nammineerlutit nalunaarsuininnut allagartat uppernarsaatit ilanngullugit nassiutissagakkit.
Akileraartarnermut Aqutsisoqarfimmiit allakkat e-Boksi atorlugu nassiunneqartarnerat eqqaamallugu
Innuttaasut 15-ileereersimasut tamarmik Pisortanit e-Boksikkut allagarsisalernissaminnut pisussaaffeqarput. Sullissivik.gl-ikkut Digitalimik allagarsisarnerit eqqumaffigisassaavoq. e-Boksimi allagarsigaangavit e-boksit sms-ikkut imaluunniit e-mailitigut nalunaartussanngorlugu iluarsisinnaavat.
Innuttaasut 1950-i sioqqullugu inuusimasut allallu allakkanik digitaliusunik pisartagaqartussaanngitsut Akileraartarnermut Aqutsisoqarfimmiit allakkerivikkut suli allagarsisassapput.
Pigisanit pissarsiat nammineerlutit naatsorsornissai eqqumaffigikkit
Innuttaasut amerlasuut inuunermut sillimmasiissutinut soraarnerussutisiaqarnissamullu aaqqissuussinernut nammineerluni nalunaarsuiffissamik immikkut ittumik aammattaaq nassinneqarput.
Danmarkimiit imaluunniit nunani allaniit aningaasaliissutinut iluanaarutitit nalunaarsuinermi nammineq nalunaarsussavatit. Soraarnerussutisiaqarnissamut aaqqissuisut nunani allaniittut paasissutissat tamaasa Akileraartarnermut Aqutsisoqarfimmut toqqaannartumik nalunaarutigineq ajormatigit.
Innuttaasut soraarnerussutisiaqarnernut aaqqissuussinernut ukununnga, P+ aamma Velliv-imut ilaasortat paasissutissat nammineerluni nalunaarsornissaat eqqumaffigissavaat.
Innuttaasut nunatsinni soraarnerussutisiaqarnissamut aaqqissuussanik SISA-mi, Grønlandsbankenimi imaluunniit Bank Nordikimi peqartut iliuuseqassanngillat. Taakkunannga Akileraartarnermut Aqutsisoqarfik toqqaannartumik nalunaarutisisarmat.
Eqqaamallugu aamma pigisanit pissarsianit iluanaarutisiatit danmarkimi il.il. soraarnerussutisiaqarnissamut aaqqissuussinermut akiliutitit nammineerluni nalunaarsuiffimmut nalunaarsorsinnaagakkit. Akiliisimaninnut allagartaq uppernarsaat nammineerluni nalunaarsuinermut ilanngullugu nassiutissavat taamaattumillu Soraarnerussutisiaqalernissamut aaqqissuussinermut peqataasussaatitaanermi ileqqaartussaatitaanermi naatsorsuinermi atorneqarsinnaalluni.
Nammineerluni nalunaarsuiffik pillugu naatsumik nassuiaat
Aningaasarsiannut paasissutissat sulisitsisunniit, aningaaserivinniit pisortaniilluunniit Akileraartarnermut Aqutsisoqarfimmut nassiunneqartarput. Paasissutissat tamakku toqqammavigalugit Akileraartarnermut Aqutsisoqarfik nammineerluni nalunaarsuiffiit suliarisarpai. Taamaattumik ukiup siuliani aningaasaqarnikkut inissisimanerit nammineerluni nalunaarsuiffimmi missingersorneqartarpoq.
Nammineerluni nalunaarsuiffimmi kisitsisit kukkuneqarpata imaluunniit amigaateqarpata pisussaavutit kisitsisinut eqqortunut aaqqiissuteqarfigissallugit. Nammineerluni nalunaarsuiffinnut allannguutissaqaruit ilassutissaqaruilluunniit tamanna aaqqiissuteqarfigissavat nalunaarutigaluguluunniit. Sullissivik.gl aqqutigalugu nalunaarsinnaavutit, aamma allakkatigut imaluunniit e-mailitigut Akileraartarnermut Aqutsisoqarfimmut allannguutitit nassiussinnaavatit.
Nammineerluni nalunaarsuiffik naqiteriigaq akuerisinnaagukku iliuuseqaqqittariaqanngilatit.
Nammineerluni nalunaarsuiffik qanoq naqqiivigineqarsinnaanersoq sullissivik.gl-imi atuarsinnaavat.